وش يعني..


وش يعني..



ليلة خميس – كلمات/ ساره:


اشتقت له حيل واشواقي تعذبني
وانا على شان م اتعذب وش الدبره
.
ياصاحبي كيف تشعر بي وتفهمني
وانا ببعدك حياتي كلها غبره
.
ياما تعنيت واحساسي يسابقني
واليوم ياشين مردودي ويامره
.
شفت التخلي بعينك قام يجرحني
ياحر صدر المتيم فيك ياحره
.
متعود القلب عالطعنات وش يعني
ضاري بهمه غدى عبره وله خبره
.
الله يجبر عزاء قلبي ويجبرني
ويجبر مصاب الضلوع اللي غدت كسره
.
واليوم قررت اسافر عنك حللني
يمكن مع الوقت تطريني وتتشره
.
يسقي زماناً مضى مابينك وبيني
واللي حصل منك بنسى خيره وشره
.
لاهب نسناس عطري غمض و زرني
في حلمي اللي ماراودني ولا مره
.
يمكن ليا جيت ب احلامي تعبرني
اجمل من الواقع المخذول ياحسره
.
قدمت عونك وبحسانك مغرقني
لكن قلبك عن الاشواق وش غره
.
انا على الظن واحسبتك على ظني
ياكبر صدمات عمري فيك ياكبره
.
ياليت قلبي يطاوعني ويسمعني
واحرق ملفات قدرك داخلي مره
.
اضيق واجيك شايل منتهى حزني
ولاشفت عينك اقول لله …. يادره
.
انسى همومي وجرحي وانت تحضني
واقول بالنفس احبه لو يحب عشره
.
ياقلبي ارجوك تسلى لا تغربلني
اخبرك صابر وحيلك دوم ياصبره
.
بكره مع الوقت تتغير وترحمني
لامات نار المولع وانطفى جمره


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *