جمر الغضب..


جمر الغضب..



ليلة خميس- الشاعر/ عيد المساعيد:


يا النادر الطحطوح يا مناطح الريح
يا زمام يا زيزوم يا حزام داره
.
يا جدار نجد ام الوجيه المفاليح
يا ستار طيبه عن ذواري غباره
.
يا منوخ العسرات من غير تنقيح
الصعب لا شافك يغير مساره
.
يا مخيب لهقوة بطون المشافيح
خابت امانيهم بعد كل غاره
.
يا طويق ما هزك هبوب اللوافيح
راسي على كتف اليمامه مناره
.
يا مرجح الكفه على عداك ترجيح
مشهر يمينك واصبعينك اشاره
.
يا نعيش سادات الزمان الطحاطيح
يا نعيش قادات وملوك واماره
.
حلين ما من ثالث وبالك مريح
قول فعل دايم تروم الصداره
.
زحزيح من دارٍ بنوها الزحازيح
ما تلتفت للاش راس النعاره
.
مثلك نسف كل الحكي والتصاريح
حتى تجاوز في طموحه مداره
.
وان كانها مسابق على المجد ما يطيح
مقدام قومٍ كل ابوهم جساره
.
يقدح شرار ويوم صارت مقاديح
جمر الغضب شب وسنا النار شاره
.
واللي يبي تلميح نعطيه تلميح
المملكه ما تبيت بيوم ثاره
.
ويا نجد لو كثرت عليك النوابيح
تبشري يا نجد جتك البشاره
.
حنا لها وان روح الصايح يصيح
ما نلتفت لارباحها والخساره
.
ويا محمد ال سعود بيتين توضيح
في كل دار لدار حطو سفاره
.
وانا سفير الدار ومناطح الريح
سيف الشعر محتل فيه الصداره


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *