لعل قصر ما يجيله ظلالي..


لعل قصر ما يجيله ظلالي..



كلمات: الأمير الشاعر/ محمد الأحمد السديري (رحمة الله):


يقول من عدى على راس عالي.
رجم طويل يدهله كل قرناس.
،
في راس مرجوم عسير المنالي.
تلعب به الأرياح مع كل نسناس.
،
في مهمه قفر من الناس خالي.
يشتاق له من حس بالقلب هوجاس.
،
قعدت في راسه وحيد لحالي.
براس الطويل ملابقه تقل حراس.
،
مندكر في مرقبي وش غدا لي.
وصفقت بالكفين ياس على ياس.
،
أخذت أعد أيامها والليالي.
دنيا تقلب ما عرفنا لها قياس.
،
كم فرقت بين غالي وغالي.
لو شفت منها ربح ترجع للإفلاس.
،
يقطعك دنيا ما لها أول وتالي.
لو أضحكت للعين تقرع بالأجراس.
،
المستريح اللي من العقل خالي.
ما هو بلجات الهواجيس غطاس.
،
ما هوب مثلي مشكلاته جلالي.
ازريت اسجلهن بحبر وقرطاس.
،
حملي ثقيل وشايله باحمالي.
وأصبر على مر الليالي والاتعاس.
،
لا خاب ظني بالرفيق الموالي.
ما لي مشاريه على نايد الناس.
،
لعل قصر ما يجيله ظلالي.
ينهد من عالي مبانيه للساس.


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *